ଶଶି ଥରୁର

ନାଗପୁର: କଂଗ୍ରେସ ଦଳରେ ଥିବା ଯୁବ କର୍ମୀଙ୍କ କଥାକୁ ଶୁଣିବାର ସମୟ ଆସିଯାଇଛି। କଂଗ୍ରେସ ଅଧ୍ୟକ୍ଷ ପଦ ପାଇଁ ନାମାଙ୍କନପତ୍ର ଦାଖଲ କରିଥିବା ଲୋକସଭା ସାଂସଦ ଶଶି ଥରୁର ଆଜି ନାଗପୁରରେ ଏହି କଥା କହିଛନ୍ତି।

ସେ କହିଛନ୍ତି, ଆମେ ବଡ଼ ନେତାମାନଙ୍କୁ ସମ୍ମାନ ଦେଉ। କିନ୍ତୁ ଏବେ ଦଳର ଯୁବକର୍ମୀଙ୍କ କଥା ଶୁଣିବାର ବେଳ ଆସିଛି। ଆମେ ଦଳ ସାଂଗଠନିକ ରୂପରେଖକୁ ବଦଳାଇବା ଦିଗରେ କାର୍ଯ୍ୟ କରିବୁ। ଦଳର କର୍ମୀମାନଙ୍କୁ ଗୁରୁତ୍ୱ ଦିଆଯିବା ଉଚିତ୍‌।
୨୦୧୪ ନିର୍ବାଚନରେ ପରାଜୟ ପରଠୁ କଂଗ୍ରେସ ଏକାଧିକ ନିର୍ବାଚନରେ ପରାଜୟ ବରଣ କରିଥିବା ବେଳେ ଦଳର ସାଂଗଠନିକ ବ୍ୟବସ୍ଥାରେ ଆମୂଳଚୂଳ ପରିବର୍ତ୍ତନ ଆବଶ୍ୟକ ବୋଲି ଜି-୨୩ ନେତାଏ ଦାବି କରି ଆସୁଛନ୍ତି।

କଂଗ୍ରେସ ଅଧ୍ୟକ୍ଷ ପଦ ପାଇଁ ଶଶି ଥରୁର ଓ ମଲ୍ଲିକାର୍ଜୁନ ଖାଡ଼ଗେଙ୍କ ମଧ୍ୟରେ ଲଢ଼େଇ ହେବ। ଅକ୍ଟୋବର ୧୭ ତାରିଖରେ ଏହି ପଦ ପାଇଁ ନିର୍ବାଚନ ହେବ।